सडकमा फोहर फ्याँक्ने एक वडाध्यक्षलाई वीरगञ्ज महानगरपालिकाले दण्डित गरेको छ । सडकमा जथाभाबी फोहर फ्याँकेको भन्दै वीरगञ्ज महानगरपालिका वडा नम्बर ६ का वडाध्यक्ष जयप्रकाश शाहलाई महानगरले दण्डित गरेको हो ।
वडाध्यक्ष शाहले आफ्नो घर अगाडि फोहर फ्याँकेको गुनासो स्थानीय बासिन्दाले गरेपछि उनलाई कारबाही स्वरूप महानगरपालिकाले दुई हजार रुपैयाँ दण्डित गरेको सरसफाइ शाखा प्रमुख सर्फुदीन मियाँले जानकारी दिए ।
महानगर क्षेत्रलाई सुन्दर, सफा, स्वच्छ र पर्यावरणयुक्त नमुना महानगर बनाउने उद्देश्यका साथ नियमित फोहर उठाउने गाडी गए पनि त्यसमा फोहर नहालेर सडकमा जथाभाबी फोहर फ्याँक्नेलाई महानगरपालिकाले दण्डित गर्दै आएको छ ।
यता वडाध्यक्ष शाहले भने महानगरपालिका भित्रका केही उच्च पदस्थ व्यक्तिहरूले आफूलाई षडयन्त्रपूर्वक बदनाम गराएको आरोप लगाएका छन् । ‘झन्डै एक साता अगाडि गरिएको जरिवानाको विषयलाई आज सञ्चारमाध्यममा दिएर मलाई बदनाम गराउन खोजिएको छ,’ उनले भने, ‘मैले गरेको कामबाट डाहा गर्नेहरूले म विरुद्ध षडयन्त्र गरेका हुन् ।’
शाहले सडकमा फोहर आफूले नफ्याँकेको दाबी गरेका छन् । ‘गाडीमा राख्न लागि घरको मूल ढोका अगाडि राखिएको फोहरलाई सडकका कुकुरहरूले ल्याएर थुपारी दिएका हुन्,’ उनले भने ।
