१० पटक सगरमाथा आरोहण गर्ने लाक्पा शेर्पाको डकुमेन्ट्री नेटफ्लिक्समा हेर्न पाइने भएको छ । नेपालमा जन्मेकी लाक्पा हाल अमेरिकाको वेस्ट हार्टफोर्डमा बस्छिन्, उनीबारेको वृत्तचित्र सन् २०२४ मा देखाइनेछ ।
‘माउन्टेन क्विन स् द समिट्स अफ लाक्पा शेर्पा’ बेलायती फिल्म निर्माताले लुसी वाकरले बनाएकी हुन् । यसलाई गत हप्ता टोरन्टो फिल्म फेस्टिबलमा देखाइएको थियो । पहिलो स्क्रिनिङको केही दिनपछि नेटफ्लिक्सले यसलाई विश्व भरी प्रसारण गर्ने अनुमति पाएको हो ।
फेस्टिबलमा फिल्मबारे भनिएको छ, ‘लाक्पा शेर्पा सगरमाथाको सफल आरोहण गरेर सकुशल फर्किने पहिलो नेपाली महिला हुन् । यो जोसुकैको लागि पनि जीवनको सबैभन्दा महत्त्वपूर्ण उपलब्धि हो । ’
शेर्पाले किशोर अवस्थामा हुँदा भरिया भएर विभिन्न हिमालको आरोहण गर्न सुरु गरिन् । उनले सन् २००० मा सगरमाथा आरोहण गर्ने पहिलो नेपाली महिलाको रेकर्ड स्थापित गरिन् । त्यति बेला उनको समूहमा उनी एक्लै सगरमाथा आरोहण गर्न सफल भएकी थिइन् । यसअघि सन् १९९३ मा पासाङ ल्हामु शेर्पाले सगरमाथा आरोहण गरेकी थिइन् तर उनको फर्किने क्रममा निधन भयो ।
यता लुसी वाकरले यसअघि ‘ब्लाइन्डसाइट’, ‘द क्र्यास रिल’, ‘वेस्ट ल्यान्ड’ र ‘द सुनामी एन्ड द चेरी ब्लजम’ नामका डकुमेन्ट्री बनाइसकेकी छिन् ।
