जेन जी आन्दोलनमा क्रममा जिल्ला प्रहरी कार्यालय कास्कीको भवन जलाउँदै गर्दा घाइते भएका एक जनाको मृत्यु भएको छ ।
जिल्ला प्रहरी कार्यालय कास्कीको भवन जलाउँदै गर्दा घाइते भएका चितवनको भरतपुर –१० का ४३ वर्षीय विजय लामाको पोखरा स्वास्थ्य विज्ञान प्रतिष्ठान साबिक पश्चिमाञ्चल क्षेत्रीय अस्पताल पोखरामा उपचारका क्रममा मृत्यु भएको हो ।
पोखरा–१६ बस्ने गरेको र कतिपयलाई शुक्लागण्डकी–११ पनि ठेगाना बताउने गरेका लामा जिल्ला प्रहरी कार्यालय कास्कीमा तोडफोड तथा आगजनी गर्ने क्रममा आगोको मुस्लोमा परि जलेर घाइते भएका थिए।
शरीरको ७० प्रतिशत भाग जलेको अवस्थामा अस्पताल ल्याइपुर्याइएका लामाको आज बिहान १२ बजे उपचारको क्रममा मृत्यु भएको अस्पतालका निर्देशक प्राडा प्रेमराज पंगेनीले जानकारी दिए ।
कास्कीका अधिकांश सरकारी कार्यालयहरु तोडफोड र आगजनी गरिसकेपछि आन्दोलनकर्मीहरु डोजरसहित जिल्ला प्रहरी कार्यालय पुगेका थिए । उग्र प्रदर्शन गरिरहेका आन्दोलनकर्मीहरु कार्यालयको गेट तोडफोड गर्दै प्रहरी कार्यालय छिरेका थिए। प्रहरी कार्यालय छाडेर निस्किएको थियो ।
प्रहरी कार्यालयभित्र पनि तोडफोट, लुटपाट र आगजनी भएको थियो । आन्दोलनकर्मीले लुटेको केही हतियार प्रहरीले प्राप्तसमेत गरिसकेको र केही अझै बाँकी प्रहरीको भनाइ छ ।
प्रहरी कार्यालयभित्रै डोजर लिएर गएका युवामाथि शुरुमा गोली लागेको थियो । उनको उपचार भइरहेको छ ।
आन्दोलनकर्मीहरुले पोखरा रत्नचोकमा रहेको अभि इकयुपमेन्ट डिभिजन कार्यालयको डोजर, लोडर, स्काभेटर र टिप्पर निकालेर सडकमा चलाउँदै, तोडफोड गर्दै हिँडेका थिए ।
आन्दोलनकर्मीहरुले पोखरामा अधिकांश प्रमुख सरकारी निकाय तोडफोड र आगजनी गरेका छन् ।
