विश्वकप तयारी अन्तर्गत भएको मैत्रीपूर्ण खेलमा अर्जेन्टिनाले होन्डुरसलाई २–० ले पराजित गरेको छ।
मांसपेशीको थकानबाट पुनःस्थापना भइरहेका कप्तान लियोनल मेस्सी लाई बेन्चमै राखिएको खेलमा अर्जेन्टिनाले दुवै हाफमा एक–एक गोल गर्दै सहज जित निकालेको हो।
खेलको ३७औँ मिनेटमा होन्डुरसका क्रिस्टोफर मेलान्डेजले निकोलस टाग्लियाफिकोमाथि पेनाल्टी क्षेत्रभित्र फाउल गरेपछि अर्जेन्टिनाले अग्रता लिने अवसर पायो। उक्त पेनाल्टीलाई लाउटारो मार्टिनेजले गोलमा परिणत गर्दै टोलीलाई १–० को अग्रता दिलाए।
दोस्रो हाफको ५४औँ मिनेटमा जुलियानो सिमेओनेले लाउटारो मार्टिनेजको पासमा गोल गर्दै अर्जेन्टिनाको अग्रता दोब्बर बनाए। त्यसपछि प्रशिक्षक
लियोनेल स्कालोनीले टोलीमा धेरै परिवर्तन गरे पनि तेस्रो गोल भने थपिन सकेन।
मेसी मैदानबाहिर रहे पनि अर्जेन्टिनाको आक्रमण निकै प्रभावकारी देखियो। सिमियोने खेलभरि उत्कृष्ट प्रदर्शन गर्दै गोलका साथै थुप्रै अवसर सिर्जना गर्न सफल भए। अर्जेन्टिनाले खेलमा कुल २० प्रहार गर्दा ८ प्रहार लक्ष्यमा पुगेका थिए।
यता होन्डुरसले ४ प्रहार गरे पनि अर्जेन्टिनाका गोलरक्षकलाई कुनै कठिन परीक्षा दिन सकेन। अर्जेन्टिनाको रक्षा पंक्ति पनि मजबुत देखिएको थियो।
प्रशिक्षक स्कालोनीले मेसी आगामी जुन १६ मा अल्जेरियाविरुद्ध हुने विश्वकपको पहिलो खेलमा सुरुआती टोलीमै फर्किने अपेक्षा गरेको बताएका छन्। तर यो खेलले मेसी बिना पनि अर्जेन्टिना खतरनाक टोली रहेको सन्देश दिएको छ।
