कास्की प्रहरीले पोखरा महानगरपालिका–१८ सेदीस्थित एक घरबाट अनलाइन गेम तथा खेलकुद सट्टेबाजी सञ्चालन गरिरहेको आरोपमा आठ जनालाई पक्राउ गरेको छ। पक्राउ परेकामध्ये एक भारतीय नागरिकलाई मुख्य सञ्चालक रहेको प्रहरीले जनाएको छ।
गण्डकी प्रदेश प्रहरी कार्यालय, नेपाल प्रहरी प्रदेश कार्यालय, जिल्ला प्रहरी कार्यालय कास्की र वडा प्रहरी कार्यालय बैदामको संयुक्त टोलीले गोप्य सूचनाका आधारमा जीवन श्रेष्ठको घरमा छापा मारेको थियो। सो क्रममा अनलाइन सट्टेबाजी सञ्चालन भइरहेको अवस्थामा आठ जनालाई नियन्त्रणमा लिई थप अनुसन्धान तथा कानुनी प्रक्रिया अघि बढाइएको प्रहरीले जनाएको छ।
पक्राउ पर्नेमा दार्चुला घर भई हाल पोखरा–१८ सेदी बस्ने ३१ वर्षीय दिनेश सिंह बोहोरा, भारतको भूपा मानपुर स्थायी ठेगाना भएका तथा हाल पोखरा–१८ बस्ने ३४ वर्षीय सत्यम सिंह (मुख्य सञ्चालक), २४ वर्षीय हर्ष उसरेटे, २३ वर्षीय विशाल चाउ, २२ वर्षीय जमान सिंह तमार, २७ वर्षीय विक्रान सिंह, २६ वर्षीय अजितेश कुमार मिश्रलगायत रहेका छन्।
प्रहरीले घटनास्थलबाट सात थान ल्यापटप, छ थान मनिटर, ३१ थान मोबाइल, नौ थान किबोर्ड, चार थान मल्टिप्लग, १२ भोल्टको एक थान ब्याट्री, एक थान यूपीएस, दुई थान राउटर तथा विभिन्न कम्पनीका चार्जर बरामद गरेको छ।
प्रारम्भिक अनुसन्धानका अनुसार गिरोहले २०८२ चैत १८ (१ अप्रिल २०२६) देखि ‘सफ्टवेयर कम्पनी’ सञ्चालन गर्ने बहानामा सात कोठे घर भाडामा लिएर बसोबाससँगै अनलाइन सट्टेबाजी सञ्चालन गर्दै आएको थियो।
उनीहरूले gurubhai247.pro नामको लिंक टेलिग्राम र व्हाट्सएपमार्फत विभिन्न व्यक्तिलाई पठाई रकम डिपोजिट गराएर दर्ता गराउने र त्यसपछि क्रिकेट, फुटबल तथा क्यासिनोसँग सम्बन्धित हार–जितका खेलमा सट्टेबाजी गराउने गरेको प्रहरीको अनुसन्धानबाट खुलेको छ। खेलमा विजयी हुने व्यक्तिको खातामा अनलाइनमार्फत रकम भुक्तानी गरिने व्यवस्था मिलाइएको थियो।
प्रहरीका अनुसार उक्त गिरोहले दैनिक तीनदेखि चार लाख भारतीय रुपैयाँसम्म आम्दानी गर्ने गरेको प्रारम्भिक अनुसन्धानबाट देखिएको छ। कारोबारका लागि भारतीय नागरिकका बैंक खाता प्रयोग गरिएको तथा सबै आर्थिक कारोबार अनलाइनमार्फत हुने गरेको खुलेको छ।
अनुसन्धानका क्रममा यो गिरोह भारतबाट सञ्चालित नाम नखुलेको एउटा ठूलो नेटवर्कको २७औँ शाखा का रूपमा सञ्चालन भइरहेको प्रारम्भिक तथ्य फेला परेको प्रहरीले जनाएको छ। काम गर्ने प्रत्येक व्यक्तिले मासिक २५ हजार भारतीय रुपैयाँ पारिश्रमिक पाउने गरेको समेत खुलेको छ।
प्रहरीले बरामद भएका तीन फरक कम्प्युटरका विवरण (सिट) मा क्रमशः रु. १ अर्ब ११ करोड ९९ लाख ११ हजार ९१८, रु. ९ करोड २ लाख २२ हजार २६ र रु. १० करोड ५५ लाख ६८ हजार ६९० बराबरको क्रेडिट विवरण फेला परेको जनाएको छ। उक्त रकमको वास्तविक स्रोत, कारोबारको प्रकृति र नेटवर्कबारे विस्तृत अनुसन्धान भइरहेको जिल्ला प्रहरी कार्यालय कास्कीले जनाएको छ।
