पोखरा महानगरपालिका–१७ छोरेपाटनबाट प्रहरीले ९९ एम्पुल लागूऔषधसहित एक जनालाई पक्राउ गरेको छ।
मिति २०८३ साउन २६ गते दिउँसो करिब १२ः३० बजे छोरेपाटन क्षेत्रमा लागूऔषध बिक्री–वितरण भइरहेको भन्ने सूचनाका आधारमा जिल्ला प्रहरी कार्यालय कास्की तथा वडा प्रहरी कार्यालय बैदामबाट खटिएको प्रहरी टोलीले खोजतलास गरेको थियो।
सो क्रममा पोखरा–१७ छोरेपाटन बस्ने ३५ वर्षीय नरेन्द्र भुजको कोठाबाट बाल्टिमा लुकाइछिपाइ राखिएको अवस्थामा फेनेरागन ३३ एम्पुल, नुर्फिन ३३ एम्पुल र डाइजापाम ३३ एम्पुल गरी जम्मा ९९ एम्पुल लागूऔषध बरामद गरिएको प्रहरीले जनाएको छ।
प्रहरीले भुजलाई पक्राउ गरी लागूऔषधसम्बन्धी कसुरमा कास्की जिल्ला अदालतबाट पाँच दिनको म्याद थप गरी थप अनुसन्धान अघि बढाएको जनाएको छ।
प्रहरीले घटनाबारे थप अनुसन्धान भइरहेको जनाएको छ।
