सर्बोच्च अदालतको आदेशलाई अवहेलना गर्दा अदालतको गेटबाटै गिरफ्तार बिद्रोही ने.क.पा.का नेता धर्मेन्द्र बास्तोलालाई प्रहरीले रातारात जिल्ला प्रहरी कार्यालय काभ्रे पुर्याइएको छ।

नेता बास्तोलालाई बिना कारण गिरफ्तार गरिएको र फेरी गिरफ्तार गरिए कारबाही गर्ने कडा चेतावनीसहितको आदेश सर्बोच्चले दिए पनि प्रहरीले अदालतको गेटबाटै बलपूर्वक बिना पक्राउ पुर्जी गिरफ्तार गरी रातारात जिल्ला प्रहरी कार्यालय काभ्रे पुर्याइएको हो।

सर्बोच्च अदालतले प्रहरी महानिरीक्षक शैलेस थापाक्षेत्री र गृहसचिव महेश्वर न्यौपाने सहितका सरकारी अधिकारीलाई तोकेर भनेको छ–‘फेरि पक्राउ गरिए विपक्षीलाई संविधानको धारा १२८ (४) तथा न्याय प्रशासन ऐन ०७३ को दफा १७ बमोजिम कारवाही हुने व्यहोराको जनाउ विपक्षीहरुलाई दिनु ।’ बन्दी प्रत्यक्षीकरणको रिटमा गृह–सचिव न्यौपाने र आइजीपी शैलेश थापा सहितलाई विपक्षी बनाइएको छ । तर पनि सर्वोच्चको गेटमा बास्तोलालाई लछार पछार पार्दै पक्राउ गरेको देख्नेहरुले प्रहरीको व्यवहारलाई ‘अमानवीय’ भनेका छन् ।

यसैबीच नेता बास्तोलाकोतर्फबाट बहस पैरवी गरिरहेका बरिष्ठ अधिवक्ता एकराज भण्डारीले गृह–सचिव र आइजीपीविरुद्ध अदालतको अवहेलनाको निवेदन दर्ता गर्ने बताएका छन्।  “‘प्रधानमन्त्री, प्रहरी र गृहमन्त्रालयले कानुन मानेका छैनन्’ उनले अघि थपे – ‘दिनदहाडै कानुन मिच्न पाइँदैन, गृह–सचिव र आइजीपीविरुद्ध अदालतको अवहेलनाको निवेदन दिन्छौं ।’

नेत्रविक्रम चन्द ‘विप्लव’ समूहका सचिवालय सदस्य धर्मेन्द्र बाँस्तोला ‘कञ्चन’ लाई प्रहरीले पहिलोपटक पुस २९ गते ललितपुरको गिम्दीबाट गिरफ्तार गरेको थियो । त्यसयता सर्वोच्च र काठमाडौं जिल्ला अदालतले बाँस्तोलालाई पाँच पटक छाड्ने आदेश गरिसकेको छ । तर, सोमबार पाँचौपटक प्रहरीले उनलाई सर्वोच्चको गेटबाट पक्राउ गरेर काभ्रेपलाञ्चोक प्रहरीको हिरासतमा थुनेको छ ।