काठमाडौं । मुगुका २५ वर्षीय गणेश नेपालीको मृत्युबारे प्रतिनिधिसभामा उठेका प्रश्नको जवाफ दिँदै गृहमन्त्री सुधन गुरुङले सरकारले उनको उपचार र उद्धारका लागि सक्दो प्रयास गरेको बताएका छन्। सांसदहरूले घटनाबारे चासो व्यक्त गरेपछि समय लिएर उनले सरकारको धारणा सार्वजनिक गरेका हुन्।
प्रतिनिधिसभामा बोल्दै गृहमन्त्री गुरुङले सरकारले गणेश नेपालीलाई समयमै उपचारका लागि स्थानान्तरण गर्न आवश्यक तयारी गरेको बताए। उनका अनुसार श्री एयरलाइन्सको विमान तयारी अवस्थामा राखिएको थियो, उडानका लागि आवश्यक अनुमति पनि लिइएको थियो। तर उपचारमा संलग्न चिकित्सकहरूले बिरामीको स्वास्थ्य अवस्था स्थिर बनाएपछि मात्र स्थानान्तरण गर्न सुझाव दिएका कारण तत्काल उडान सम्भव नभएको उनले स्पष्ट पारे।
‘हामीले उहाँलाई बचाउन अथक प्रयास गरेका हौँ। श्री एयरलाइन्सको विमान रेडी गरिएको थियो, अनुमति पनि लिइएको थियो। तर चिकित्सकले बिरामीलाई स्टेबल राख्नुपर्छ भन्नुभयो, उहाँको रक्तचाप निकै कम थियो,’ गृहमन्त्री गुरुङले सदनमा भने।
सांसदहरूले घटनाप्रति विभिन्न प्रश्न उठाएको सन्दर्भमा उनले कुनै पनि व्यक्तिको पीडालाई राजनीतिक मुद्दा नबनाउन आग्रह गरे। सरकारले आफ्नो जिम्मेवारीबाट कुनै हालतमा पछि नहट्ने उल्लेख गर्दै उनले गणेश नेपालीको निधनप्रति दुःख व्यक्त गरे।
उनले सरकारले आफ्नो दायित्व ‘एक इन्च पनि नछाड्ने’ भन्दै उपचार, उद्धार र आवश्यक सबै प्रक्रिया पूरा गर्न सक्दो प्रयास गरिएको दाबी गरे। ‘नचाहँदा–नचाहँदै पनि अथक प्रयासपछि आज गणेश नेपाली भाइ हामीबीच हुनुहुन्न। हामीले त्यहाँ हुँदा आफ्नो तर्फबाट सक्दो प्रयास गरेका थियौँ,’ उनले भने।
गृहमन्त्री गुरुङले प्रतिनिधिसभाको गरिमा कायम राख्न सबै सांसदलाई आग्रह गर्दै सरकार सञ्चालनको संवैधानिक प्रक्रिया बुझेर जिम्मेवार ढंगले छलफल गर्नुपर्ने धारणा पनि व्यक्त गरे। आफूले सदन वा नेपाली जनतालाई ढाँट्ने काम कहिल्यै नगर्ने उल्लेख गर्दै उनले सत्य तथ्यकै आधारमा जवाफ दिएको बताए।
