अखिल नेपाल फुटबल सङ्घ एन्फा र कास्की जिल्ला फुटबलसँगको सहकार्यमा शान्तिका लागि फुटबल भन्ने मुल नारासहित पोखरामा आज बुधवार स्पेनी फुटबल क्लब काथेरेन्यो एफसी र पोखरा ११ बिच मैत्रीपुर्ण प्रतिष्पर्धा भएको छ । प्रतिष्पर्धामा नेपाल स्पेनी क्लव सँग ३ गोलले पराजित भएको छ ।
गण्डकी–११ को कप्तानी राष्ट्रिय फुटबल टोलीका पूर्वकप्तान अनिल गुरुङले गरेको थियो भने गण्डकी–११ को प्रशिक्षण राजेन्द्र तामाङले गरेको थियो । नेपालमा दुइवटा मैत्रीपूर्ण खेलका लागि आएको क्लवले गण्डकी ११ सँग प्रतिष्पर्धा गरेको हो ।
काथेरेन्यो स्पेनको दोस्रो डिभिजनको लिग खेलिरहेको क्लब हो । काथेरेन्यो एफसीले भोली पुस १४ गते काठमाण्डौको दशरथ रङ्गशालामा काठमाण्डौ–११ सँग प्रतिस्पर्धा गर्नेछ । काठमाण्डौ–११ को कप्तानी राष्ट्रिय फुटबल टोलीका पूर्वकप्तान विराज महर्जनले गर्नेछन् भने प्रशिक्षण मेघराज केसीले गर्नेछन् ।
स्पेनी क्लब काथेरेन्योसँग स्पेनका पूर्व राष्ट्रिय खेलाडीसहित ला लिगा फुटबल क्लब रियल मड्रिड, बार्सिलोना र एथ्लेटिको मड्रिड जस्ता ठूला क्लबमा खेलेका अनुभवी खेलाडी रहेका छन् । पोखरा लगायत समग्र नेपालमा फुटबलको विकास तथा पर्यटन प्रवर्द्धनमा सहयोग पुर्याउने लक्ष्यसहित मैत्रीपूर्ण फुटबल खेलाइएको आयोजक लुम्बिनी गार्डेन फाउन्डेसनले जनाएको छ ।
नेपाल भ्रमण गर्ने स्पेनी टोलीमा स्पेनको राष्ट्रिय टोलीबाट खेलिसकेका म्यानुयल सान्चेज डेल्गाडो मोनोलो पनि छन् । विश्व कप फुटबल १९९० मा मोनोलो स्पेनी टिमको मुख्य खेलाडी थिए ।
