पोखरार फोटोग्राफर राम गुरुङलाई छैटौ रामलाल श्रीमाया राष्ट्रिय फोटोग्राफी पुरस्कारबाट सम्मान गरिएको छ । पोखरा फोटोग्राफर संघको ४२ औं साधारण सभाको अवसर तथा विश्व फोटोग्राफी दिवस पारेर सम्मान प्रदान गरिएको हो ।
फोटोग्राफीको क्षेत्रमा लामो समयदेखी उल्लेख्य योगदान दिदैँ आएका गुरुङ फोटोपत्रकार समेत हुन् ।
उनलाई नगद २५ हजार ५ सय ५५ रुपैयाँ सहित दोसल्ला र सम्मानपत्रले सम्मान गरिएको हो ।
सम्मानित हुँदै गुरुङले फोटोग्राफर संघ आस्था र विस्वासको संस्था रहेको बताए । उनले फोटोपत्रकार हुनु अघि फोटोग्राफर नै भएको सुनाए ।
फोटोग्राफर बन्न जति सजिलो छ चुनौती पनि त्यत्तिकै भएको र पछिल्लो समय नयाँ प्रविधिसंग आफुलाई नी परिमार्जित गर्नुपर्ने आवश्यकता देखिएको बताए ।
फोटोपत्रकार हुनका लागि पहिला फोटोग्राफर बन्नुपर्ने भएपनि पछिल्लो समय सिद्यैँ फोटोपत्रकार बन्दा चुनौती थपिएको उनको भनाई छ ।
यस्तै संघमा आबद्ध सदस्यहरुको १२ पास गरेका छोराछोरीलाई सम्मान समेत गरेको थियो । उक्त कार्यक्रममा बोल्दै नेपाल उद्योग वाणिज्य संघका पुर्व अध्यक्ष आनन्द राज मुल्मीले फोटोग्राफी विधा आजको निकै आवश्यकता भएको बताए ।
फोटोग्राफि विधा अन्य विधाको तुलनामा तिब्र गतिमा परिवर्तन भइरहेको बताए । विश्वमा अनौठा प्रविधिहरु आएको सुनाउँदै उनले अहिले आर्टिफिसियल प्रविधिमा प्रवेश गरिसकेको धारणा राखे ।
फोटोग्राफी गर्ने व्यावसायीहरु प्रविधिसंगै ढल्नुपर्ने बाध्यता आइपरेको बताए । हिजोजसरी स्टुडियोमा फोटो खिचेर जिवनयापन गर्ने स्थिति नभएकाले यसको परिमार्जन गर्न आवश्यकता रहेको औल्याए ।
कार्यक्रममा पोखरा ४ का वडा अध्यक्ष देवकृष्ण पराजुली, महिला उपसमिति संयोजक रिता पौडेल, सल्लाहकार लगायतले आफ्नो धारणा राखेका थिए । यस्तै संघले पोखरा सभागृहचोकदेखी सिर्जनाचोकसम्म प्रभातफेरी समेत गरेको थियो ।
