सर्लाहीको सदरमुकाम मलंगवामा दुर्गा पूजाको मूर्ति सेलाउन जाने क्रममा स्थानीय र प्रहरीबीच झडप भएको छ। स्थानीय प्रशासनले निर्धारण गरेको बाटो अस्वीकार गरेर स्थानीय बासिन्दाले बिगतमा प्रयोग हुने बाटो जान खोजेपछि प्रहरी र स्थानीय बासिन्दाबीच झडप भएको हो।
मलंगवाको जिविस चोकमा गरिएको दुर्गा पूजाको मुर्ति सेलाउन लैजान प्रशासनले रुट निर्धारण गरेको थियो । तर स्थानीयले विगतकै मुस्लिम वस्ती हुँदै जाने रुटबाट लैजान खोजेपछि प्रहरीले रोक्दा झडप भएको प्राप्त समाचारमा जनाइएको छ।
प्रहरीले स्थितिलाई नियन्त्रणमा राख्न १६ सेल अश्रुग्यास प्रहार गरेको र दुई जना प्रहरी घाइते भएको सर्लाहीका प्रहरी प्रवक्ता डिएसपी दिपेन्द्र पजियार थारले जानकारी दिए । डिएसपी पजियारका अनुसार अहिले अवस्था समान्य भएको छ ।
प्रहरीका अनुसार जिल्लामा ६५ बढी स्थानमा दुर्गा पूजा गरिएको थियो । अन्य ठाउँमा शान्तपूर्वक रुपमा मूर्ति विर्सजन भएको प्रहरीले जनाएको छ ।
