किलियान एम्बाप्पेले स्पेनिस महारथी रियल मड्रिडसँग ‘फ्रि–ट्रान्सफर’ मा अनुबन्ध हुने करार सम्झौता गरेका छन् । पेरिस सेन्ट जर्मेनसँगको करार ३० जुनमा सकिएसँगै उनी रियलसँग अनुबन्ध हुनेछन् ।
फ्रान्सेली स्ट्राइकरले गत फेब्रुअरीमा रियलसँग अनुबन्ध हुने मौखिक सम्झौता गरेका थिए । त्यसपछि मेमा उनले सिजनको अन्त्यमा पीएसजी छाड्ने घोषणा गरेका छन् ।
२५ वर्षीय खेलाडीले अहिले रियलसँग सर्तहरूमा हस्ताक्षर गरेका छन् । जुलाई १ मा ला लिगाको ट्रान्सफर विन्डो खुलेपछि उनी क्लबमा आबद्ध हुनेछन् ।
सन् २०१७ मा मोनाको छाडेर पीएसजी पुगेका एम्बाप्पेले क्लबका लागि कीर्तिमानी २५६ गोल गरे । उनले सन् २०१८ मा विश्वकपको उपाधि पनि जितेका थिए ।
उनले रियलसँग सन् २०२९ सम्म क्लबमा रहने करारमा सम्झौता गरेका छन् । उनले प्रतिसिजन १।५ करोड युरो आम्दानी गर्नेछन् भने पाँच वर्षमा करारको बोनस स्वरूप १५ करोड युरो प्राप्त गर्नेछन् । उनले इमेज राइट बापतको केही रकम पनि प्राप्त गर्नेछन् ।
