पोखरा ।
पोखरा रंगशालामा बुधवारदेखि चौथो एबीसी राष्ट्रिय एट–ए–साइड ‘४५ प्लस’ भेट्रान्स फुटबल प्रतियोगिता सुरु भएको छ । उद्घाटन दिनमै प्रतिस्पर्धा निकै रोमाञ्चक देखिएको छ ।
उद्घाटन खेलमा लेकसाइड भेट्रान्सले नवबुद्ध भेट्रान्सलाई २–० गोल अन्तरले पराजित गर्दै शानदार सुरुवात गरेको छ । लेकसाइडका लागि बादल लामा र पूर्ण बहादुर गुरुङले एक–एक गोल गरे । उत्कृष्ट प्रदर्शन गर्दै पूर्ण बहादुर गुरुङ म्यान अफ दि म्याच घोषित भए ।
दोस्रो खेलमा फ्रीडम फाइटर भेट्रान्सले अभिषेक चर्च ब्वाइज भेट्रान्सलाई १–० ले हरायो । तेज बहादुर गलामीको निर्णायक गोलले टोलीलाई जित दिलायो, र उनी नै म्यान अफ दि म्याच पनि बने ।
तेस्रो खेलमा एबीसी भेट्रान्सले सानेपा भेट्रान्सलाई २–० गोल अन्तरले पराजित ग¥यो । मनकाजी गुरुङ र विश्वलाल श्रेष्ठले गोल गर्दै टोलीलाई जित दिलाए । उत्कृष्ट खेल प्रदर्शनका लागि विश्वलाल श्रेष्ठ म्यान अफ दि म्याच घोषित भए ।
अन्तिम खेलमा बगर भाइखलकले चितवन भेट्रान्सलाई २–० ले हराउँदै अघिल्लो चरणमा स्थान सुरक्षित ग¥यो । बगर भाइखलकका राजकुमार तामाङ र हिमाल थापाले एक–एक गोल गरे, जसमा हिमाल थापा म्यान अफ दि म्याच घोषित भए ।
प्रतियोगिताको दोस्रो दिन पहिलो खेलमा लेकसाइड भेट्रान्स र बौद्ध भेट्रान्स भिड्नेछन् भने दोस्रो खेलमा फ्रीडम फाइटर र जोरपाटी भेट्रान्स आमनेसामने हुनेछन् । तेस्रो खेल एबीसी भेट्रान्स र हेटौडा भेट्रान्सबीच हुनेछ भने दिनको अन्तिम खेल बगर भाइखलक र फ्रेन्ड्स क्लब भेट्रान्स (बानेश्वर) बीच हुने आयोजक एबीसी क्लबका सचिव विजय घिमिरेले जानकारी दिएका छन् ।
प्रतियोगिताको विजेताले नगद एक लाख पच्पन्न हजार पाँच सय पच्पन्न सहित शिल्ड, मेडल र प्रमाणपत्र प्राप्त गर्नेछ भने उपविजेताले सतहत्तर हजार सात सय सतहत्तर सहित, शिल्ड, मेडल र प्रमाणपत्र पाउने प्रतियोगिता संयोजक मनकाजी गुरुङले जानकारी दिए ।
प्रतियोगिताको उद्घाटन एबीसी हङकङका सल्लाहकार रक्षा बहादुर गुरुङको प्रमुख आतिथ्यमा भएको थियो । साथै एबीसी क्लबका संस्थापक अध्यक्ष राज कुमार गुरुङ, एबीसी क्लबका अध्यक्ष राजेश गुरुङ, एबीसी पोखराका सल्लाहकार सुनिल गुरुङ, एन्फा कास्की उपाध्यक्ष तथा संगम क्लबका अध्यक्ष नरेन्द्रजंग गुरुङ, गण्डकी प्रदेश फुटवल संघका महासचिव बिनोद गुरुङ, कास्की जिल्ला खेलकुद बिकास समितिका अध्यक्ष मिलन गुरुङ, भ्याली स्पोर्टस क्लबका अध्यक्ष सम्मर बहादुर श्रेष्ठ, शितलज्योती युवा क्लबका अध्यक्ष नर बहादुर गुरुङ, एकता क्लबका अध्यक्ष एक बहादुर के.सी लगायतको उपस्थिती रहेको थियो ।
