गण्डकी प्रादेशिक क्रिकेट संघको पाँचौँ साधारण सभा तनहुँको बन्दीपुरमा सम्पन्न भएको छ ।
मर्स्याङ्दी रिभर भ्यु रिसोर्टमा आयोजित कार्यक्रममा गण्डकी प्रदेशबाट राष्ट्रिय तथा अन्तर्राष्ट्रियस्तरमा उत्कृष्ट प्रदर्शन गर्ने पाँच खेलाडीलाई नगद पुरस्कारसहित सम्मान गरिएको छ।
गण्डकी प्रदेश सरकारकी सामाजिक विकास, युवा तथा खेलकुदमन्त्री रेखा गुरुङले कार्यक्रमको उद्घाटन गर्दै खेलाडीको योगदानको प्रशंसा गरिन् । संघले खेलाडीको सम्मानले उनीहरूलाई आगामी दिनमा अझ उत्कृष्ट प्रदर्शन गर्न प्रेरणा मिल्ने विश्वास व्यक्त गरेको छ।
राष्ट्रिय क्रिकेट टोलीमा स्थान बनाएका अर्जुन कुमाल, सीमाना के.सी र रचना चौधरीलाई जनही १५ हजार रुपैयाँसहित सम्मान गरिएको छ। यस्तै, नेपाल ‘ए’ टोलीमा पर्न सफल दीपक डुम्रे र यु–१९ राष्ट्रिय टोलीका वंश क्षेत्रीलाई जनही १० हजार रुपैयाँ प्रदान गरिएको छ।
कार्यक्रममा नेपाल क्रिकेट संघका केन्द्रीय उपाध्यक्ष रोशनकुमार सिंह र कोषाध्यक्ष पदमबहादुर खड्का विशिष्ट अतिथिका रूपमा सहभागी थिए ।
कोशी प्रादेशिक क्रिकेट संघका अध्यक्ष सर्वजित पाण्डे र जिल्ला खेलकुद विकास समितिका अध्यक्ष अनिल पाण्डेले गण्डकीमा क्रिकेट विकासका सम्भावना र चुनौतीबारे धारणा राखे। सहभागी वक्ताहरूले क्रिकेटको पूर्वाधार विकाससँगै नयाँ प्रतिभाको खोजी र खेलाडी उत्पादनमा विशेष ध्यान दिनुपर्नेमा जोड दिएका छन्।
संघले गण्डकीबाट राष्ट्रिय तथा अन्तर्राष्ट्रियस्तरमा प्रतिनिधित्व गर्ने खेलाडीको योगदानको कदर गर्दै उनीहरूलाई निरन्तर प्रोत्साहन र सम्मान गर्ने जनाएको छ।
