शिक्षा मन्त्री कृष्णगोपाल श्रेष्ठको पुत्ला दहन गरेको आरोपमा प्रहरीले पोखराबाट जनता समाजवादी पार्टी समर्थित दुई जना बिद्यार्थी नेता सहित तीन जनालाई पक्राउ गरेको छ।
पक्राउ पर्नेहरुमा मोर्चाका कार्यकर्ता किरण नेपाली, जनता समाजवादी पार्टीको भात्री संगठन समाजवादी बिद्यार्थी युनियनका केन्द्रीय उपाध्यक्ष नेत्र चापागाईं र केन्द्रिय सचिब रेशम सापकोटा तथा जात व्यवस्था उन्मूलन मोर्चाका कार्यकर्ता किरण नेपाली रहेका छन्।
जात व्यवस्था उन्मूलन मोर्चा गण्डकी प्रदेशको अगुवाईमा शिक्षामन्त्री श्रेष्ठको पुत्ला दहन गरिरहेको अवस्थामा उनीहरुलाई पोखराबाट पक्राउ गरिएको प्रहरीले जानकारी दिएको छ।
रुपा सुनार घटना प्रकरणमा मन्त्री श्रेष्ठको भूमिका निन्दनीय भएको भन्दै जातीय विभेदको विरोधमा पोखराको चिप्ले ढुंगास्थित मानवअधिकार चोकमा आज पुत्ला दहन गरिएको बताइएको छ ।
जिल्ला प्रहरी कार्यालय कास्कीका निमित्त प्रमुख डिएसपी सुबाश हमालले उनीहरुविरुद्ध मुद्दा चलाउने कि नचलाउने भन्ने बारेमा अहिले नै निर्क्यौल नभएको जानकारी दिएका छन्। उनीहरुले स्थानीय प्रशासनद्वारा जारी गरिएको लक डाउन उल्लङ्घन गरेकाले पक्राउ गरिएको डिएसपी हमालले जानकारी दिए। उनीहरुलाई अहिले जिल्ला प्रहरी कार्यालय कास्कीमा रखिएको छ।
यसैबीच प्राप्त जानकारी अनुसार, कास्की जिल्लास्थित संयुक्त विधार्थी संगठनले केन्द्रिय परिपत्र अनुशार मंगलबार साँझ पांच बजे पोखराको चिप्लेढुंगामा प्रधानमन्त्री केपी शर्मा ओलीको राजिनामाको माग सहित पुत्ला दहन गर्ने निर्णय गरेको छ।
कास्की जिल्लास्थित संयुक्त बिद्यार्थी संगठनहरुको आज बसेको संयुक्त बैठकले त्यस्तो निर्णय गरेको प्राप्त समाचारमा जनाइएको छ।
