सोमबार विराटनगरमा अवतरण हुन नसकेको बुद्ध एयरको विमान काठमाडौंमा फर्काएर फोर्स ल्यान्डिङ गरिएको छ। सो विमान सकुशल अवतरण भएसँगै त्यसमा सवार ७३ यात्रु र चालकदलका सदस्यहरुको ज्यान जोगिएको छ।

ठूलो दुर्घटनाबाट विमान जोगिएपछि सो विमानका पाइलटको यतिबेला चर्चा भइरहेको छ। आज बिहान बुद्ध एयरको जहाज क्याप्टेन आङ्गेलो शेर्पाले उडाएका थिए। हाल उनै पाइलट शेर्पाको सामाजिक संजालदेखि संचारमाध्यमहरुमा चर्चा भइरहेको हो।

उनले सावधानीपूर्वक विमान अवतरण गराएर ७३ यात्रुको ज्यान जोगाएको भन्दै उनको प्रशंंसा भइरहेको छ। वास्तवमा ल्यान्डिङ गियरमा समस्या भएपछि विराटनगरमा जहाज अवतरण हुन सकेको थिएन। त्यसपछि उक्त ७३ यात्रु सवार जहाज पुनः काठमाडौं नै फर्किएको थियो।

काठमाडौं फर्किँदासम्म पनि विमानको समस्यामा सुधार नआएपछि विमान काठमाडौंकै आकाशमा घुमिरहेको थियो। सोमबार बिहान ८ बजेर ३३ मिनेटमा काठमाडौंबाट विराटनगरका लागि उडेको बुद्ध एयरको अल्फा नोभेम्बर इन्डिया जहाज विराटनगरको आकाशमा दुई फन्को लगाएर काठमाडौं फर्किएको थियो।
काठमाडौंस्थित त्रिभुवन अन्तर्राष्ट्रिय विमानस्थल स्रोतका अनुसार विमानको एउटा पांग्रा नखुलेका कारण अवतरण हुन सकेन र केही समय ‘झन्डै २ घण्टा’ आकाशमै होल्ड हुन परेको थियो।

काठमाडौं आएपछि आकाशमा झन्डै १० फन्को लगाएको जहाज त्रिभुवन अन्तर्राष्ट्रिय विमानस्थलमा १० बजेर २० मिनेटमा सुरक्षित रूपले अवतरण गरिएको बुद्ध एयरले जनाएको छ। बुद्ध एयरका अनुसार काठमाडौंको आकाशमै विमान होल्ड गर्नुको उद्देश्य विमानको इन्धन कम गर्नु थियो जसले विमान दुर्घटना हुन कम गर्दछ।

यात्रुको अनुभव
बुद्ध एयर आज अवतरण हुन नसकेपछि विमान आकाशमै हुँदा यात्रुहरुको रुवाबासी चलेको एक यात्रु अनमोल प्रधान बताउँछन्।

उनी भन्छन्,‘विमान अवतरण अब होला अब होला भन्दाभन्दै विमान अवतरण हुन सकेन। विमानमा यात्रुहरु रुन र कराउन थालेका थिए। जसका कारण नडराएका मानिसहरु पनि आत्तिन थाले। केही मानिस बेहोस भएका थिए।’

उनी रुँदै भन्छन्,‘हामीले हाम्रो ज्यान जोगिन्छ भनेर आशा मारिसकेका थियौं। विमान अवतरण हुनेबेला त्यहाँ तल दम्कल, आर्मी प्रहरी तयारी अवस्थामा देख्दा ज्यान जान्छ भन्ने सोचेका थियौं। हामीलाई भगवानले मात्र बचाएको जस्तो लाग्छ। भगवान पशुपति नाथको कृपाले बाँच्यौं। हामी सबै हात जोडेर भगवान सम्झिँदै बसिरहेका थियौं।’