उपचारका लागि गण्डकी मेडिकल कलेज पोखरामा आएका बिरामी तथा तिनका कुरुवाहरुको मोबाइल चोरी गरेको आरोपमा प्रहरीले एक जना युवालाई पक्राउ गरेको छ। पक्राउ पर्ने युवा पोखरा महानगरपालिका वडा नम्बर १३ भद्रकाली बस्ने बर्ष २२ को कुशल नेपाली रहेको प्रहरीले जानकारी दिएको छ।
अभियुक्त नेपालीलाई वडा प्रहरी कार्यालय रामबजार पोखराको प्रहरी टोलीले पक्राउ गरेको बताइएको छ। अभियुक्त नेपालीले पोखराको नयाँबजारमा रहेको गण्डकी मेडिकल कलेजबाट विभिन्न समयमा पटक पटक बिरामी तथा बिरामीका कुरुवाको मोबाइल चोरी गरेको आरोप लगाइएको छ। अभियुक्त नेपालीले पोखरा महानगरपालिका वडा नम्बर १३ संगमटोलबाट पनि मोबाइल चोरी गरेको बताइएको छ।
अभियुक्त नेपालीको साथबाट प्रहरीले चोरीका तीन थान मोबाईलहरु पनि बरामद भएको प्रहरीको दाबी छ। पक्राउ परेका अभियुक्तबिरुद्ध थप अनुसन्धान कारबाही भैरहेको वडा प्रहरी कार्यालय रामबजार पोखराले जनाएको छ।
