पेट्रोलियम पदार्थसहित दैनिक उपभोग्य बस्तुसंग जोडिएका बस्तुमा भैरहेको मूल्यबृद्बिबिरुद्ध नेपाल कम्युनिष्ट पार्टीले आव्हान गरेको नेपाल बन्द सकिएको छ । बन्द सकिएपछि पार्टी महासचिव विप्लवले वक्तव्य जारी गर्दै सहयोग गर्ने सबैलाई धन्यवाद दिएका छन् ।

महासचिव विप्लवले पेट्रोलियम, खाद्य पदार्थलगायत अत्यावश्यक उपभोग्य सामग्रीमा सरकारले अत्यधिक मूल्यवृद्धि गरेको विरोधमा नेकपाले आज मङ्गलबारका लागि आह्वान गरेको नेपाल बन्द ऐतिहासिक रूपले सफल भएको बताएका छन् । उनले मूल्यवृद्धि फिर्ता नभएसम्म सङ्घर्ष जारी रहने भएकाले साथ दिइरहन जनसमुदायलाई आह्वान पनि गरेका छन् ।

वक्तव्य जारी गर्दै महासचिव विप्लवले भनेका छन्, ‘हाम्रो महान् तथा जनप्रिय पार्टी नेपाल कम्युनिस्ट पार्टीद्वारा आयोजित महँगी र मूल्यवृद्धिविरुद्ध आजको नेपाल बन्द आमजनताको सहयोग, समर्थन र सहभागितामा अभूतपूर्व रूपले सफल भएको छ । उक्त बन्द सफल बनाउन सहयोग गर्ने सबै जनसमुदायलाई पार्टी धन्यवाद ज्ञापन गर्दछ ।’

बन्दका क्रममा देशभरबाट तीन सयभन्दा बढी नेता–कार्यकर्ता गिरफ्तार ृपरेको उनले बताएका छन् । साथै गिरफ्तार नेता–कार्यकर्ताहरूलाइ बिनासर्त रिहा गर्न माग पनि गरेका छन् ।

महासचिव विप्लवले अगाडि भनेका छन्, ‘बन्दका क्रममा राज्यले पार्टी केन्द्रीय सदस्य कमरेड क। सन्देश, क। आधारलगायत तीन सयभन्दा बढी नेता–कार्यकर्ता गिरफ्तार गरेको छ । हाम्रो पार्टी उक्त दमनको घोर भत्र्सना गर्दछ । साथै गिरफ्तार नेता–कार्यकर्ताहरूलाइ बिनासर्त रिहा गर्न माग गर्दछ ।’

उनले मूल्यवृद्धि र महँगी जनताको हितविपरीत भएका कारण मूल्यवृद्धि खारेज नभएसम्म यो सङ्घर्ष निरन्तर अगाडि बढ्ने जानकारी गराएका छन् । साथै सङ्घर्षमा आमजनतालाई निरन्तर सहभागी बन्न पनि अनुरोधसमेत गरेका छन् ।