महेन्द्र जनसहयोग आधारभूत विद्यालयमा बालकक्षाका लागि डेकोरेशन र स्टेशनरी सामाग्री वितरण कार्यक्रम सम्पन्न भएकाे छ ।

लायन्स क्लब अफ पोखरा आँगनद्वारा स्याङ्जा जिल्ला फेदीखोला गाउँ पालिका २ स्थानचौरमा अवस्थित श्री महेन्द्र जनसहयोग आधारभूत विद्यालयमा बालबालिकाहरूको लागि बाल पुस्तकहरू, बालकक्षाका लागि डेकोरेशन र स्टेशनरी सामाग्री वितरण कार्यक्रम सम्पन्न भएको छ ।

कार्यक्रममा विद्यालयका तर्फबाट प्रधानाध्यापक तारापति सुबेदीले आफ्नो भनाइ राखेका थिए  भने विद्यालय व्यवस्थापन समितिका अध्यक्ष बलबहादुर गोदारले शिक्षा प्रेमी, स्थानीय वासी,हाल जापानमा कार्यरत् समाजसेवी गोदार उपकार थापाको पहलमा पर्वतारोही, समाजसेवी, शिक्षा प्रेमी नोगुचि केन र वहाँको संस्था Peak Aid ;Ken Noguchi’s Foundation, Japan को पूर्ण आर्थिक सहयोगमा जीर्ण विद्यालयको भौतिक निर्माण सम्पन्न भएको, लायन्स क्लब अफ पोखरा आँगन द्वारा आयोजित कार्यक्रमवारे जानकारी गराउँदै धन्यवाद प्रकट गरे ।

 विद्यालयमा थप अतिरिक्त कार्यक्रमको विस्तारका लागि सहयोगको आग्रह समेत गरेका छन् । लायन्स क्लब अफ पोखरा आँगनका अध्यक्ष ला.मनोज कुमार श्रेष्ठको अध्यक्षतामा सम्पन्न उक्त कार्यक्रममा ला.प्रदिप बज्रचार्यले स्वागत मन्तव्य सहित ने.रू.८०,०००/-बराबरको पुस्तक तथा स्टेशनरी सामाग्री हस्तान्तरण गरेको बताए । उक्त रकम जापानको फुकुसीमाबासी याबे स्युजो ज्युद्वारा सहयोग प्राप्त भएको थियो । प्रमुख अतिथि ला. चण्डी प्रसाद अर्यालले आगामी कार्यक्रम सञ्चालन गर्ने अवसर मिलेको बताए  । कार्यक्रममा ला. संतोष कुमार घिमिरे, ला.राम कुमार श्रेष्ठ ,ला.मत्ताराजा महर्जन, ला.विनोद श्रेष्ठ, राजन श्रेष्ठ, गणेश श्रेष्ठ र विद्यालय परिवारको उपस्थिति थियो । कार्यक्रमको अन्त्यमा सभाध्यक्षले आगामी दिनमा सहयोग विस्तार गर्दै जाने प्रतिवद्धता सहित कार्यक्रम समापन गरेका थिए ।