कतार एयरवेज सहिद स्मारक ए डिभिजन लिग फुटबल प्रतियोगिता २०७८ अन्तर्गत आफ्नो अन्तिम खेलमा विभागिय टोली त्रिभुवन आर्मी फुटबल क्लबसँग १-१ गोलको बराबरी खेल्दै नेपाल आयल निगम फुटबल क्लब मनाङ मर्स्याङदी पाँचौं स्थानमा रह्दै लिग अन्त्य गरेको छ ।
त्रिपुरेश्वरस्थित दशरथ रंगशालामा सम्पन्न भएको खेलमा मनाङका लागि कप्तान अञ्जन विष्टले गोल गरि सुरुवाती अग्रता दिलाएका थिए । पुजन उपरकोटीको कर्नरमा दीनेश राजवंशीले हेड गरेको बललाई आर्मीका गोलकिपर विकेश कुथुले पन्च गरे त्यहि रिबाउन्डमा अन्जनले नजिकबाट गोल गरेका थिए ।
त्यस्तै दोस्रो हाफमा आत्मघाती गोलबाट आर्मीले खेलमा बराबरी गरेको थियो । खेलको ७६ औं मिनेटमा सन्तोष तामाङलेको फ्रिकिकमा फ्रयान्कलिन र अशोक बराल ठोक्किदा उनीहरुलाई लागेर बल आत्मघाती गोल भएको थियो ।
उक्त बराबरीसँगै १३ खेलको समाप्तीमा आर्मीले २३ अंक जोड्दै दोस्रो स्थान पक्का गरेको हो । न्यू रोड टिम एनआरटीले पनि शनिबार अर्को खेलमा नेपाल पुलिस क्लबलाई २(१ ले हराउँदै आर्मीसँग समान २३ अंक बनाएको थियो । तर हेड टु हेडका आधारमा आर्मी दोस्रो र एनआरटी तेस्रो भएको हो । २१ अंक जोडेको सातदोबाटो युथ क्लब चौथो र २१ मनाङ पाँचौं स्थानमा रहेको छ ।
