कास्की जिल्लाको अन्नपूर्ण गाउपालिका १ लेवाडेस्थति पोखरा (बागलुङ राजमार्गमा आज बिहान भएको सवारी दुर्घटनामा परेर छोरीको मृत्यु भएको छ भने बाबु गम्भीर घाइते भएका छन्।
पोखराबाट पर्वततिर जाँदै गरेको ग३च ३५२५ नम्बरको निजि कारले पोखरा आउंदै गरेको ग१८प ८१९१ नम्बरको मोटरसाइकललाई ठक्कर दिंदा छोरीको मृत्यु भएको हो भने बाबु गम्भीर घाइते भएका छन् ।
जिल्ला ट्राफिक प्रहरी कार्यालय कास्कीका अनुसार, सो दुर्घटनामा परेर पर्वत जिल्लाको कुश्मा नगरपालिका वडा नम्बर ४ की १८ वर्षीया सबिना पुनको मृत्यु भएको हो भने उनका बाबु ४५ वर्षीय जितबहादुर पुन गम्भीर घाइते भएका छन्। उनको हाल मेट्रोसिटि हस्पिटल पोखरामा उपचार भैरहेको प्रहरीले जानकारी दिएको छ। शरीरका विभिन्न भागमा चोटपटक लागेका उनको अवस्था गम्भीर रहेको पनि प्राप्त जानकारीमा उल्लेख छ।
कारका चालक अहिले फरार छन्। उनी पनि उक्त दुर्घटनामा घाइते भएको हुनसक्ने अनुमान प्रहरीले गरेको छ।
