सरकारसंग भएको सहमतिको मसी सुक्न नपाउदै सिन्धुपाल्चोकस्थित बन्चरेडाँडाका स्थानीय बासिन्दाले बन्चरेडाँडामा फोहोर फाल्न रोकेका छन् ।
सहमति पछि काठमाडौंबाट फोहोर बोकेर गएका गाडीहरुलाई स्थानीयले आज बिहान बाटोमै रोकेका छन् ।
शहरी विकास मन्त्रालय, काठमाडौं महानगरपालिका, नुवाकोटको ककनी गाउँपालिका र धादिङको धुनिबेसी नगरपालिकाका प्रतिनिधिहरुबीच मंगलबारबाट काठमाडौंको फोहोर बिसर्जन गर्ने सहमति भएको थियो । तर आज बिहान उनीहरुले उक्त सहमति नमान्ने भन्दै फोहोर बिसर्जन गर्न नदिएको काठमाडौं महानगरपालिकाका एक कर्मचारीले जानकारी दिए ।
गत १४ जेठबाट काठमाडौं महानगरपालिका, ललितपुर महानगरपालिका र अन्य नगरपालिकाहरुको फोहोर उठ्न सकेको छैन । फोहोर सडकमै थुप्रिएकाले दुर्गन्ध बढेको छ ।
