पाेखरा ।
मिस्टर एण्ड मिस विश्वकर्मा इन्टरकन्टिनेन्टल गण्डकी-२०२३ हुने भएको छ ।
विब्रोस इन्टरटेन्मेन्टले विश्वकर्मा समुदायको युवायुवतीहरूको प्रतिभा प्रस्फुटन गराउनका लागि यो प्रतियोगिता आयोजना गरेको आयोजकले जानकारी गराएको हो।
प्रतियोगिता गण्डकी प्रदेश भित्रका विश्वकर्मा समुदायका युवायुवतीलाई लक्षित गरेर आयोजना गरिएको सौन्दर्य प्रतियोगितामा विश्वकर्मा समुदायका १६ देखि २९ वर्ष उमेरका अविवाहित युवायुवतीले प्रतियोगितामा भाग लिन पाउनेछन् ।
अडिसन मार्फत उत्कृष्ट १५ पुरुष र उत्कृष्ट १५ महिला छनोट गरेर असोजको ५ गतेदेखि १९ गतेसम्म विभिन्न चरणमा तालिम हुनेछ। तालिममा सम्बन्धित क्षेत्रका विज्ञहरूले सहजीकरण गर्नेछन् ।
प्रतियोगिताको फाइनल प्रतिष्पर्धा आगामी असोज २० गते पोखरामा भव्य कार्यक्रमको आयोजना गरेर गरिनेछ। प्रतियोगिताको दुवै विधाका विजेताले उपाधि सहित नगद ५० हजार हात पार्नेछन् ।
यसका अलावा काठमाडौँमा आयोजना हुने मिस्टर एण्ड मिस विश्वकर्मा इनटरकन्टीनेन्टल सिजन थ्री मा सहभागी हुन पाउनेछन् ।
यस अगाडिको श्रृङखला काठमाडौँमा मात्र केन्द्रित भए पनि यसपालि सबै प्रदेशमा प्रतियोगिता आयोजना गरेर त्यहाँबाट विजेता बनेकाहरूबिच काठमाडौँमा प्रतिष्पर्धा गराउन लागिएको आयोजकले खुलाए ।
पोखरामा आयोजना हुने प्रदेश स्तरीय प्रतियोगितामा ९ लाख ५० हजार खर्च हुने आयोजकको अनुमान छ । प्रतियोगितामाबाट बचत भएको रकम पोखरा २२ मा निर्माण भइरहेको विश्वकर्मा संग्रहालय निर्माणसँगै विभिन्न सामाजिक कार्यमा खर्चने आयोजकले बताए ।
पत्रकार सम्मेलनमा इभेन्ट इन्चार्ज बुद्धि वि.क. लामगादे, सल्लाहकार गणेश बराइली, इभेन्ट डाइरेक्टर पवन रामदाम, लगायतले बोलेका थिए ।
विश्वकर्मा समुदायका युवायुवतीलाई विभिन्न नेतृत्व तथा व्यक्तित्व विकासका साथै सामाजिक कार्यमा अग्रसर गराउनका लागि प्रतियोगिताको आयोजना गरिएको उनीहरूले बताए ।
