मेलबर्न । अस्ट्रेलियाले विदेशी विद्यार्थीसम्बन्धी भिसा नियम कडा बनाएको छ । आप्रवासी सङ्ख्या कीर्तिमानी उचाइमा पुगेको सरकारी तथ्याङ्कले देखाएकै समयमा अस्ट्रेलियालेले नियम कडा बनाएको हो ।

नयाँ नियम मार्च २३ देखि लागू भएको छ । यो नियमले विद्यार्थी भिसामा आउनेहरूको अङ्ग्रेजी भाषाको मापदण्ड कडा पारेको छ । नयाँ नियमले बारम्बार नियम मिच्ने विश्वविद्यालयहरूलाई विदेशी विद्यार्थी भर्ना गर्नबाट रोक्ने अधिकार पनि सरकारलाई दिनेछ ।

यो साता चालिएको यस पहलले आप्रवासीको सङ्ख्या निरन्तर कम गर्ने र अध्यागमन प्रणालीमा देखिएको दरार पुर्ने काम गर्ने गृह मामिला मन्त्री क्लेयर ओ’निलले एउटा विज्ञप्तिमा भनेका छन् । अस्ट्रेलियामा पढ्ने नभएर कमाउने वा काम गर्ने नियत राखेर आउने विद्यार्थीहरूको आगमन पूरै रोक्न नयाँ ‘असली विद्यार्थी परीक्षा’ लागू गरिने उनले

यसबाहेक पनि भिजिटर भिसामा थप बस्न नपाउने सर्त कडाइका साथ लागू गरिने भएको छ । गएको वर्ष अस्ट्रेलियाले कोभिड युगमा सुरु गरिएको छूटहरू अन्त्य गर्न कयौँ कदम चालेको थियो । यसमा विदेशी विद्यार्थीलाई असीमित घन्टासम्म काम गर्न दिने नीति पनि परेको थियो ।

कोभिडको महामारीका कारण व्यवसायहरूले सामना गर्नु परेको कर्मचारी अभावको स्थितिलाई सम्बोधन गर्न अस्ट्रेलियाले सन् २०२२ मा वर्षभरिमा आउन पाउने आप्रवासीहरूको सङ्ख्या बढाएको थियो । तर अचानक विदेशी कामदार र विद्यार्थीको सङ्ख्या बढेपछि पहिला देखि नै दबाबमा रहेको घरभाडा बजारमा चाप बढेर थेग्नै नसक्ने भएको थियो ।

सन् २०२४ को जनवरीसम्ममा अस्ट्रेलियामा ५ लाख ६७ हजार विदेशी विद्यार्थी रहेको शिक्षा मन्त्रालयको आँकडाले देखाएको छ । यो भनेको गत वर्षको सोही अवधिको तुलनामा २६ प्रतिशत धेरै हो । अस्ट्रेलियामा अधिकांश विदेशी विद्यार्थी एसियाका छन् । शिक्षा मन्त्रालयका अनुसार देशका आधारमा विदेशी विद्यार्थीको सबैभन्दा ठुलो जमात चिनियाँ, भारतीय, नेपाली, फिलिपिनी र भियतनामी छन् ।