पोखराको बाटुलेचौरस्थित बिन्ध्यवासिनी माध्यमिक विद्यालयमा अन्तर सदनात्मक र खुल्ला तीज गीत प्रतियोगिता सम्पन्न भएको छ ।

नेपाली महिलाको महान पर्व हरितालिका तीजको अवसरमा विभिन्न तहका विद्यार्थीलाई तीजको परम्परा र मौलिक भाकाको विषयमा जानकारी दिने उद्घेश्यले आयोजित कार्यक्रममा खुल्ला तर्फ नम्रता सुनारको समुह प्रथम, प्रिति विकको समुह द्वितीय, विश्वास पोखरेलको समुह तृतीय र एन्जिला भट्टराईको समुह सान्त्वना भएका छन् । त्यस्तै जुनियर तर्फ अन्तर सदनात्मक प्रतियोगितामा रातो सदन प्रथम र निलो सदन दोस्रो भएको प्रावि तहका सह ईन्चार्ज गोविन्द शर्मा पौडेलले जानकारी दिए । विजयी विद्यार्थीलाई प्रधानाध्यापक कृष्णप्रसाद आचार्य, सह प्रधानाध्यापक राम वहादुर बाँनिया,प्रावि तह ईन्चार्ज ईन्दु भट्टराईले पुरस्कार प्रदान गरे । विद्यार्थीको प्रतिभा र प्रस्तुतीलाई ईन्दु भट्टराई,सिर्जना सिग्देल, दुर्गा सापकोटा, विष्णुप्रसाद पौडेल, पुष्पा थापा र कामना थापाले मुल्यांकन गरेका थिए ।

कार्यक्रममा प्रधानाध्यापक आचार्यले तीज पर्व नेपाली मौलिक संस्कृति भएको वताउँदै, यसको मौलिकताको संरक्षण गर्न नयाँ पुस्ता अग्रसर हुनुपर्नेमा जोड दिए । प्रावि तहका सह ईन्चार्ज गोविन्द शर्मा पौडेलले विद्यार्थीमा अन्तरनिहित प्रतिभा प्रष्फुटनका लागि कार्यक्रम महत्वपुर्ण रहेको वताए । सह प्रधानाध्यापक बाँनिया र विद्यार्थी जस्मिन सुनारको अध्यक्षतामा भएको कार्यक्रमको संचालन संगिता शर्मा र पुनम आचार्यले गरेका थिए ।

प्रतियोगी विद्यार्थीले मौलिक भाका र नृत्य प्रस्तुत गरेको कार्यक्रममा कक्षा १ देखि १२ सम्मका विद्यार्थीले सहभागिता जनाएका थिए ।