पोखरा । पोखराको फेवातालमा पौडी खेल्ने क्रममा डुबेर बेपत्ता भएका एक भारतीय नागरिकलाई सशस्त्र प्रहरी बलको विपद् व्यवस्थापन टोलीले उद्धार गरेको छ।
सशस्त्र प्रहरी बल नम्बर २४ गण कालिका कास्कीका अनुसार पोखरा महानगरपालिका–६ स्थित फेवातालमा शुक्रबार दिउँसो करिब ४ः५० बजे अन्दाजी ३५/३६ वर्षीय भारतीय नागरिक रोहित कुमार पौडी खेल्ने क्रममा डुबेर बेपत्ता भएका थिए।
घटनाको जानकारी प्राप्त हुनासाथ फेवा वाच एण्ड रेस्क्यु टावरबाट सशस्त्र प्रहरी सहायक निरीक्षक देबेन्द्र के.सी.को कमाण्डमा विपद् व्यवस्थापन टोली तत्काल घटनास्थल पुगेको थियो। टोलीले खोजी अभियान सञ्चालन गरी करिब २० मिनेटपछि, साँझ ५ः१० बजे तालको करिब १० फिट गहिराइबाट रोहित कुमारलाई अचेत अवस्थामा फेला पारी बाहिर निकालेको थियो।
उद्धारपछि उनलाई तत्काल उपचारका लागि पोखरा स्वास्थ्य विज्ञान प्रतिष्ठान (पश्चिमाञ्चल क्षेत्रीय अस्पताल) पठाइएको नम्बर २४ गण कालिका कास्कीले जनाएको छ।
