पोखराको लामाचौर चोकमा २७ औं जिल्लास्तरीय ‘तायाः मचा नृत्य प्रतियोगिता (२०८३’ आयोजना हुने भएको छ।
‘परम्पराको सम्मान, सभ्य समाजको पहिचान’ भन्ने मूल नाराका साथ नेवाः खल कास्कीको आह्वान र लामाचौर नेवाः खल गुठीको आयोजनामा यो प्रतियोगिता हुन लागेको हो।
नेपाल एक बहुभाषिक र बहुसांस्कृतिक राष्ट्रको रूपमा विश्वसामु परिचित रहेको र लाखौं पर्यटकहरू नेपालको कला संस्कृति र रहनसहन अवलोकन गर्न आउने गरेको विज्ञप्तीमा उल्लेख छ।
आफ्नो संस्कृतिलाई जोगाउनु र भावी पुस्तालाई हस्तान्तरण गर्नु नागरिकको दायित्व रहेको कुरालाई जोड दिँदै कला संस्कृतिका माध्यमबाट देशको आर्थिक एवं पर्यटन प्रवर्धन गर्न सकिने विश्वास आयोजकको छ।
पोखराको ऐतिहासिक एवं सांस्कृतिक धरोहरको रूपमा रहेको तायाः मचा नृत्य प्रतियोगितात्मक रूपमा नेपाल अधिराज्यभरिमा कास्की जिल्लामा मात्र हुँदै आएको छ।
यस वर्षको प्रतियोगितामा कास्की जिल्लाभर छरिएर रहेका नेवाः समुदायका विभिन्न कचाः खल र तायाः मचा समितिहरूबाट करिब ३८ टिमको सहभागिता रहने जानकारी दिइएको छ।
कार्यक्रमलाई व्यवस्थित बनाउन आवश्यक नीति, नियम र सर्तनामाहरूको पालना गर्न सबै कचाः खलहरूको सहमतिमा गृहकार्य भइसकेको आयोजकले जानकारी दियोे ।
२७ वर्ष पुरानो इतिहास बोकेको गाईजात्रा पर्वले सामाजिक सद्भाव, प्रेम र भाईचाराको सन्देश प्रवाह गर्दै समाजलाई एक सूत्रमा बाँध्न सफल भएको दाबी गरिएको छ।
तायाः मचा नृत्य नेवाः समुदायको मात्र नभएर सबै जातजाति र समुदायको साझा कार्यक्रमको रूपमा परिणत हुँदै गएकाले यसलाई राष्ट्रिय स्तरको पर्वको रूपमा विस्तार गर्न आवश्यक रहेको आयोजकको ठहर छ।
विगतका वर्षहरूमा जस्तै यस वर्ष पनि प्रतियोगितालाई सफल बनाउन मनकारी व्यक्तिहरूले सहयोग गरेका छन्।
पोखरा ३ तेर्सापट्टि निवासी रामकाजी श्रेष्ठ, रविन्द्र श्रेष्ठ, शंकर श्रेष्ठ र कविन्द्र श्रेष्ठको परिवारले आफ्ना दिवंगत मातापिता बालकुमारी श्रेष्ठ र हेमप्रसाद श्रेष्ठको स्मृतिमा नृत्य प्रतियोगिताको पुरस्कार र सहभागी टिमलाई प्रोत्साहन रकम प्रदान गर्ने जानकारी नेवाः खल कास्कीका अध्यक्ष अशोक पालिखेले दिए।
यस कार्यक्रमको मुख्य उद्देश्य परम्पराको सम्मान गर्दै सभ्य समाजको पहिचानमा युवाहरूलाई अग्रसर गराउनुका साथै पर्यटन प्रवर्धनमा टेवा पुर्याउनु रहेको बताइएको छ।
एक दिने कार्यक्रम भए पनि यसको व्यवस्थापनका लागि करिब ३६ लाख रुपैयाँ खर्च हुने अनुमान गरिएको छ।
खर्च व्यवस्थापनका लागि पोखरा महानगरपालिका, महानगरपालिकाका वडाहरू, प्रदेश सरकार, स्थानीय संघ संस्था, उद्योगी व्यवसायी र व्यक्तिगत वैदेशिक दाताहरूलाई आर्थिक स्रोतको रूपमा लिइएको आयोजकले जनाएको छ।
प्रतियोगितालाई सफल बनाउन लामाचौर मिसाः पुचः र लामाचौर ल्याम्ह पुचःले सह(आयोजना गर्ने भएका छन्।
मूल समारोह समितिका संयोजक सुशील कुमार श्रेष्ठ र नेवाः खल कास्कीका अध्यक्ष अशोक पालिखेले सम्पूर्ण कास्की जिल्लाबासी र सञ्चारकर्मीहरूलाई कार्यक्रममा उपस्थितिका लागि निमन्त्रणा समेत गरे।
