पोखरा । नेपाली फुटबलको प्रतिष्ठित प्रतियोगिता आहा रारा पोखरा गोल्डकप फुटबल प्रतियोगिताको २६औँ संस्करण आगामी २०८३ माघ ५ देखि १६ गतेसम्म सञ्चालन हुने भएको छ।
सहारा क्लब पोखराको आयोजनामा हुने प्रतियोगिताको मिति क्लबले सार्वजनिक गरेको हो। ‘खेलकुदको विकासमा सहकार्य गरौँ, पोखरालाई खेलकुद पर्यटन सहरका रूपमा स्थापित गरौँ’ भन्ने नारासहित प्रतियोगिता आयोजना हुँदै आएको छ।
हिमश्री फुड्स प्रालिको उत्पादन आहा रारा तयारी चाउचाउ मुख्य प्रायोजक रहेको प्रतियोगिता पोखरा महानगरपालिकाको संरक्षकत्वमा सञ्चालन हुनेछ। प्रतियोगितालाई राष्ट्रिय खेलकुद परिषद्, गण्डकी प्रदेश खेलकुद परिषद्, अखिल नेपाल फुटबल संघ, नेपाल पर्यटन बोर्डलगायत विभिन्न संघसंस्था तथा सहयोगीहरूले साथ दिँदै आएका छन्।
पोखरामा फुटबलको विकास, खेलकुदको प्रवर्द्धन र राष्ट्रिय तथा अन्तर्राष्ट्रियस्तरमा नेपाली फुटबलको पहिचान अभिवृद्धि गर्ने उद्देश्यले प्रतियोगिता आयोजना हुँदै आएको हो। प्रतियोगिताले प्रतिभाशाली खेलाडीलाई आफ्नो क्षमता प्रदर्शन गर्ने अवसर प्रदान गर्नुका साथै पोखरालाई खेलकुद पर्यटनको आकर्षक गन्तव्यका रूपमा स्थापित गर्न योगदान पुर्याउँदै आएको छ।
प्रतियोगितामा सहभागी हुने टोली, खेलतालिका, पुरस्कार राशि तथा अन्य विवरण पछि सार्वजनिक गरिने क्लबले जनाएको छ। प्रतियोगितालाई सफल बनाउन क्लबले आवश्यक तयारीसमेत अघि बढाउने भएको छ।
