सन् २०२७ मा आयोजना हुने आईसीसी पुरुष एकदिवसीय क्रिकेट विश्वकपको छनोट प्रक्रियाअन्तर्गतको क्वालिफायर प्लेअफ प्रतियोगिता नेपालमा आयोजना हुने भएको छ।
नेपाल क्रिकेट संघ (क्यान)का अनुसार प्रतियोगिता आगामी डिसेम्बर ४ देखि २१ गतेसम्म काठमाडौंमा सञ्चालन हुनेछ।
प्रतियोगितामा आठ टोलीले प्रतिस्पर्धा गर्नेछन् । आईसीसी क्रिकेट विश्वकप लिग–२ को अंकतालिकामा पछाडि रहेका चार टोली तथा क्रिकेट विश्वकप च्यालेन्ज लिग ‘ए’ र ‘बी’ का शीर्ष दुई–दुई टोलीले प्रतियोगितामा सहभागिता जनाउनेछन्।
लिग–२ बाट नेपाल, क्यानडा, नामिबिया र संयुक्त अरब इमिरेट्स (यूएई) सहभागी हुनेछन्। च्यालेन्ज लिग ‘बी’ बाट इटाली र युगान्डाले स्थान सुरक्षित गरिसकेका छन्। च्यालेन्ज लिग ‘ए’ बाट छनोट हुने टोलीको टुंगो लाग्न बाँकी छ।
प्लेअफ प्रतियोगितामा उत्कृष्ट प्रदर्शन गर्दै शीर्ष चार स्थान हासिल गर्ने टोलीले सन् २०२७ मा दक्षिण अफ्रिका र नामिबियामा संयुक्त रूपमा आयोजना हुने आईसीसी पुरुष क्रिकेट विश्वकप छनोट प्रतियोगितामा स्थान बनाउनेछन्। त्यसैले नेपालका लागि घरेलु मैदानमा विश्वकपसम्म पुग्ने सम्भावना कायम राख्ने यो महत्वपूर्ण अवसर हुनेछ।
नेपालले प्रतियोगिता आयोजना गर्ने भएपछि डिसेम्बरमा भारत ‘ए’ टोलीसँग खेल्ने तय भएको तीन खेलको शृंखलाको तालिका पनि परिवर्तन हुने भएको छ। क्यानका सचिव पारस खड्काका अनुसार नेपाल र भारतीय क्रिकेट नियन्त्रण बोर्ड (बीसीसीआई) बीचको समन्वयमा नयाँ तालिका तय गरिनेछ।
घरेलु मैदानमा हुने प्रतियोगिताले नेपाली खेलाडीलाई समर्थकको साथमा खेल्ने अवसर प्रदान गर्नुका साथै नेपालमा अन्तर्राष्ट्रिय क्रिकेटको प्रवर्द्धनमा समेत योगदान पुर्याउने अपेक्षा गरिएको छ।
