प्रतिष्ठित संस्था बगर भाई खलकको आयोजनामा शनिवार सम्पन्न ‘५ औं स्व.रञ्जित गुरुङबगर भाई खलक एट–ए–साइड अन्तर्राष्ट्रिय भेट्रान्स फुटबल प्रतियोगिताको’ फाइनलमा टि वर्गरलाई उपाधि जिताउन भुपेन लिम्वुले २ र रमेश गुरुङले एक गोलको योगदान दिए ।

उपाधि संगै टिवर्गरले नगद १ लाख ५१ हजार १ सय १ सय ११ सहित रनिङ्ग शिल्ड,पदक र प्रमाणपत्र प्राप्त गरेको छ भने एविसीले उपाविजेता बन्दै नगद ७५ हजार ५ सय ५५ सहित ट्रफी, पदक र प्रमाणपत्र प्राप्त गरेको छ । फाइनल खेलमा म्यान अफ दि म्याचको ट्रफी टि वर्गरका भूपेन लिम्वुले हात पारे ।

“स्वास्थ्यको लागि एक घण्टा व्ययाम, नागरिकहरुका लागी नौलो आयाम” भन्ने मूल नाराका साथ गत पुष २६ गतेबाट सञ्चालन भएको प्रतियोगितामा टि वर्गरका भुपेन लिम्वु सर्वोत्कृष्ट खेलाडी घोषित हुँदै नगद ट्रफी सहित नगद १० हजार हात पारेका छन् भने उनी उत्कृष्ट मिडफिल्डर हुँदै थप नगद ५ हजार समेत हात पारे । प्रतियोगिता अन्तर्गत अन्य विद्यामा अन्तर्गत उत्कृष्ट गोल रक्षकमा टि वर्गरका मिन बहादुर बस्नेत, उत्कृष्ट डिफेण्डरमा एविसीका विष्णुलाल श्रेष्ठ, उत्कृष्ट फवार्डमा टि वर्गरका नगेन लिम्वु घोषित भए । उनीहरुले जनही नगद ५ हजारका साथमा ट्रफी हात पारे ।
एपाधि विजेता टिम तथा खेलाडीहरुलाई प्रतियोगिताका मुख्य प्रायोजक स्व।रञ्जित गुरुङका छोरी ज्वाँई मेजर खुसिमान गुरुङ ‘एमभिओ’ र छोरी मञ्जु गुरुङ, प्रदेश खेलकुद परिषदका सदस्य सचिव तेज बहादुर गुरुङ, बगर भाई खलक यूकेका अध्यक्ष दिलरास गुरुङ, तमु धि यूकेका अध्यक्ष हितकाजी गुरुङ, सहारा युकेका अध्यक्ष रि।ले कुशाङ गुरुङ, सहारा युकेका निवर्तमान अध्यक्ष कुमार गुरुङ, बगर भाई खलकका संस्थापक अध्यक्ष चन्द्रमान गुरुङ ‘सिएम’, वगर भाई खलकद्वारा सम्मानित व्यक्तित्व महेश गुरुङ लगायतले शिल्ड, मेडल, ट्रफी र नगद वितरण गरेका थिए ।

४० बर्ष देखि ६५ बर्षको उमेर समुहका पाका खेलाडीहरुको खेलबाट नयां पिढीलाई खेलकूद प्रति अभिरुची जगाई भविष्यमा खेलाडी उत्पादन गर्ने लक्ष्य राखिएको उक्त प्रतियोगितामा २५ टिमको सहभागिता रहेको संस्थाका अध्यक्ष दिल बहादुर गुरुङले बताएका छन् । उक्त प्रतियोगिता सफल बनाउन बिगत वर्षमा झैं यस बर्ष पनि सहारा युकेले द्वितिय पुरस्कार रु ७५ हजार ५ सय ५५ प्रायोजन गरेको थियो भने नेपालको चौधरी गु्रप समेतले सह प्रायोजन गरेको थियो । यसै गरी बगर भाई खलक यूकेका अध्यक्ष दिलरास गुरुङले नगद एक लाख सहयोग गरेका थिए । पूर्व राष्ट्रिय खेलाडी ओम गुरुङले ८ थान बल र नगद २० हजार प्रदान गरेका छन् ।